ဘေဘီလေးနဲ့ အာလူး
စာဖတ်သူထဲမှာ အာလူးကြိုက်တဲ့သူများ ရှိပါသလား။အာလူးထောင်း၊အာလူးချက် က စလို့ အာလူးကြော်အထိ အာလူးဟာ ကျွန်မတို့ရဲ့ နေ့စဉ်အစားအစာထဲမှာ တခုအပါအဝင်ဖြစ်ပါတယ်။အာလူးဟာ အာဟာရပြည့်ပြီး ဗိုက်ဝလွယ်တဲ့အတွက် လူကြိုက်များတာတော့ မဆန်းလှပါဘူး။
အာလူးကြိုက်တဲ့ ဖေဖေ၊မေမေတို့ကလည်း သားသား၊မီးမီးလေးတွေကို အာလူး စမ်းပြီးကျွေးချင်ကြပါတယ်။ကျွေးချင်ပေမယ့် ဓာတ်မတည့်မှာ၊အစာမကြေဖြစ်မှာ၊မျိုချတဲ့အချိန် နင်သွားမှာ မိဘတွေအနေနဲ့ စိုးရိမ်ကြပါတယ်။ဒါကြောင့်မို့ ဘေဘီလေးတွေကို အာလူးကျွေးလို့ရရဲ့လား။သူ့ရဲ့ကောင်းကျိုး၊ဆိုးကျိုးတွေက ဘာရှိမလဲ။အသက်ဘယ်လောက်က စ ကျွေးလို့ရမလဲဆိုတဲ့အကြောင်းကို မျှဝေပေးချင်ပါတယ်။
ဘေဘီလေးတွေကို မိခင်နို့ချို တမျိုးပဲ မွေးကင်းစကနေ တိုက်ကျွေးနေရာမှ အသက် ၆ လပြည့်တဲ့အခါ ဖြည့်စွက်စာ စကျွေးကြပါပြီ။ဖြည့်စွက်စာကျွေးတဲ့အခါ ကြေအောင်ချေထားတဲ့အစာ၊မိခင်နို့ရည်နဲ့ ပုံစံတူ အရည်ပျစ်ပျစ်တွေကို ၃/၄ ရက်တခါ အစာအသစ် စမ်းစမ်းကျွေးလေ့ရှိကြပါတယ်။ဒီလိုအချိန်မှာ အာလူးကို တခြားအစာတွေနဲ့ ရောပြီး စမ်းကျွေးလို့ရပါတယ်။ဒါကြောင့်မို့ အသက်အရွယ်အားဖြင့်တော့ ဖြည့်စွက်စာ စကျွေးတဲ့ အသက် ၆ လမှာ ဘေဘီလေးတွေကို အာလူး စကျွေးလို့ရပါပြီ။
အာလူးဟာ ကစီဓာတ်များစွာပြည့်ဝတဲ့ အာဟာရတန်ဖိုးများတဲ့အစားအစာတခုလည်းဖြစ်ပါတယ်။Folate, Iron, Zinc, Vitamin B 6 နဲ့ Vitamin C တွေပါဝင်တဲ့အတွက် ခုခံအားကိုတိုးပွါးစေပြီး ရောဂါပိုးမွှားတွေကို တိုက်ထုတ်ပေးပါတယ်။Choline ပါတဲ့အတွက်ကြောင့် ဘေဘီလေးတွေရဲ့ ဦးနှောက်ဖွံ့ဖြိုးမှုကို အထောက်အကူပြုတဲ့အတွက် မှတ်ဉာဏ်စွမ်းအားကောင်းစေပြီး ဉာဏ်ရည်တိုးတက်စေပါတယ်။အူလမ်းကြောင်းတလျှောက်ကကောင်းမွန်တဲ့ပိုးမွှားများကိုတိုးပွါးစေလို့ ဝမ်းပျက်ဝမ်းလျှောဖြစ်ခြင်းမှလည်း ကာကွယ်ပေးနိုင်ပါသေးတယ်။
ဘေဘီလေးတွေကို အာလူးကိုကျွေးတဲ့အခါ အတုံးလိုက်ကျွေးတာထက်စာရင် အရည်ပုံစံနဲ့ ချေထားတဲ့ပုံစံနဲ့သာ စကျွေးသင့်ပါတယ်။အာလူးနဲ့ ဓာတ်မတည့်တာကရှားပေမယ့် အာလူးရဲ့အမဲစက်လေးတွေကို ပြောင်အောင်သန့်စင်ပြီးမှ ကျွေးရပါမယ်။နှင်းခူရောဂါရှိတဲ့ ဘေဘီလေးတွေကိုတော့ တည့်၊မတည့် အထူးဂရုပြုပြီး ကျွေးသင့်ပါတယ်။အာဟာရတန်ဖိုးများစွာပါတဲ့ အာလူးကို လူကြီးတွေသာမက ဘေဘီလေးတွေပါ ကြိုက်မှာ အသေအချာပဲမို့ စမ်းကျွေးကြည့်သင့်ပါတယ်နော်။