သားအိမ်ခေါင်းကင်ဆာကာကွယ်ဆေးကဘာကြောင့်ထိုးသင့်သလဲ
သားအိမ်ခေါင်းကင်ဆာ ဖြစ်ရခြင်းအကြောင်းတွေထဲက တခုကတော့ Human Papilloma Virus (HPV) လို့ခေါ်တဲ့ HPV virus ကြောင့်ဖြစ်ပါတယ်။Human Papilloma Virus (HPV) ဟာ လိင်ဆက်ဆံရာကနေ ကူးစက်လာတဲ့ ဗိုင်းရပ်စ်ပိုးတစ်မျိုးဖြစ်ပြီး အမျိုးအစားပေါ်မူတည်လို့ ရောဂါပြင်းထန်မှုနှုန်း ကွာနိုင်ပါတယ်။ဒါပေမယ့် ကံကောင်းတာကတော့ သားအိမ်ခေါင်းကင်ဆာဟာ ကာကွယ်ဆေးထိုးပြီး ကြိုတင်ကာကွယ်လို့ရတဲ့ ရောဂါလည်း ဖြစ်နေပြန်ပါတယ်။
သားအိမ်ခေါင်းကင်ဆာရောဂါဟာ အထူးသဖြင့်
-လိင်ဆက်ဆံဖော်များတဲ့အမျိုးသမီးတွေ
-လိင်ဆက်ဆံဖော်များတဲ့ partner နဲ့ အတူနေမိတဲ့ အမျိုးသမီးတွေ
-HIV ပိုးကဲ့သို့ ခုခံအားကျဆင်းသော ရောဂါအခံရှိသူများအစရှိတဲ့အမျိုးသမီးတွေ
-အသက် ၁၈နှစ်မပြည့်ခင် လိင်ဆက်ဆံမှုအကြိမ်အရေအတွက်များတဲ့အမျိုးသမီးတွေ
သူတို့တွေမှာဆိုရင် HPV ပိုးကူးစက်နိုင်ခြေများပြီး သားအိမ်ခေါင်းကင်ဆာဖြစ်ဖို့အလားအလာများပါတယ်။
ဒါ့အပြင် ဆေးလိပ်သောက်တဲ့အမျိုးသမီးတွေက ဆေးလိပ်မသောက်တဲ့အမျိုးသမီးတွေထက် သားအိမ်ခေါင်းကင်ဆာဖြစ်နိုင်ခြေ၂ဆ ပိုမြင့်ပါတယ်။ဒါ့အပြင် မွေးလမ်းကြောင်း၊ကျောက်ကပ် သို့မဟုတ် ဆီးအိမ်ကင်ဆာ ဖြစ်ဖူးသူ၊သားအိမ်ခေါင်းကင်ဆာ မျိုးရိုးရှိသူ၊ကိုယ်၀န်ဆောင်ဖူးတဲ့အကြိမ်အရေအတွက်များသူနဲ့ သန္ဓေတားဆေးကိုအချိန်ကြာကြာစွဲစွဲမြဲမြဲသောက်သူတွေမှာသားအိမ်ခေါင်းကင်ဆာဖြစ်နိုင်မှုနှုန်းများပါတယ်။အထူးသဖြင့် ဆီးချို၊ သွေးတိုးရှိပြီး အဝလွန်တယ်ဆိုရင် ပိုပြီးသတိပြုသင့်ပါတယ်။
သားအိမ်ခေါင်းကင်ဆာကာကွယ်ဆေးကို အသက် ၉နှစ်မှစ၍ ထိုးနှံနိုင်ပြီး ၉နှစ်မှ ၁၃နှစ် လိင်ဆက်ဆံမှုမရှိသေးတဲ့အရွယ်မှာ ထိုးတာက ပိုထိရောက်တယ်လို့ လေ့လာချက်တွေအရတွေ့ရှိထားပါတယ်။တကယ်လို့ လိင်ဆက်ဆံမှုရှိနေပြီဆိုတဲ့ အမျိုးသမီးဆိုရင်တော့ သားအိမ်ခေါင်းအချွဲအမြှေးပါး စစ်ဆေးပြီးမှ ကာကွယ်ဆေးကို စထိုးသင့်ပါတယ်။အသက် ၁၃ နှစ်ထိ ကလေးတွေဟာ ၂ ကြိမ်ပဲ ထိုးဖို့ လိုအပ်ပြီး ၁၃ ကျော်သွားရင်တော့ ၃ ကြိမ်တိတိ ထိုးဖို့ လိုအပ်ပါတယ်။1st dose နှင့် 2nd dose အများဆုံး ၁နှစ်ခြားလို့ရပါတယ်။
ဒါပေမယ့် ကာကွယ်ဆေးထိုးပြီးရင်တောင်မှ အသက် ၄၀ အထက် အမျိုးသမီးတွေဟာ သားအိမ်ခေါင်းအချွဲအမြှေးပါးစစ်ဆေးခြင်းကို ၅ နှစ်တကြိမ် ပြုလုပ်ဖို့ လိုအပ်ပါတယ်။သားအိမ်ခေါင်းကင်ဆာရောဂါဟာ ကာကွယ်ဆေးရှိရက်သားနဲ့ မထိုးထားတဲ့အတွက်ကြောင့် အမျိုးသမီးတွေ မကြွေလွင့်သင့်ဘဲ ကြွေလွင့်နေရခြင်းဖြစ်ပါတယ်။ငယ်ငယ်ထဲက သားအိမ်ခေါင်းကင်ဆာကာကွယ်ဆေးကိုစနစ်တကျထိုးထားပြီး ကြီးလာတဲ့အခါမှာလည်း သားအိမ်ခေါင်းအချွဲမြေးပါး သေချာစစ်ဆေးမယ်ဆိုရင်တော့ ရောဂါကို ကာကွယ်ပြီးသားဖြစ်မှာ အသေအချာပါပဲရှင်……
- My-Medicine ရှိ သားဖွားမီးယပ်အထူးကုဆရာဝန်ကြီးများနှင့် ပြသရန် >> https://mymedicine.com.mm/r/OG