Supplement တွေ တကယ်ပဲ လိုအပ်ပါသလား
စျေးကွက်ထဲမှာ လွယ်လင့်တကူဝယ်ယူရရှိနေတဲ့ အားဆေးတွေဟာ ကျွန်မတို့နေ့စဉ်စားသောက်နေတဲ့ အစားအစာတွေထဲမှာပါဝင်ပြီးသားဖြစ်တဲ့ vitamin နဲ့ mineral တွေပဲဖြစ်ပါတယ်။ဒါကြောင့်မို့ လူကြီးတချို့ဟာ ပါးစပ်ကစားနိုင်နေသရွေ့ အားဆေးလုံးဝ သောက်ဖို့မလိုဘူးလို့ ယူဆကြသလို တချို့ကလည်း အားဆေးပုံမှန်သောက်မှ ကျန်းမာမယ်လို့ ထင်တတ်ကြပါတယ်။ဒါဆိုရင် ဘယ်အယူအဆက ပိုမှန်နေပါသလဲ။
ယနေ့ခေတ်မှာတော့ ငွေကြေးတတ်နိုင်တဲ့သူတွေဟာ ကောင်းနိုးရာရာ အားဆေးတွေကို တနေ့ ၁ မျိုးမှ ဆယ်မျိုးအထိ သောက်နေကြတာကို လေ့လာတွေ့ရှိရပါတယ်။ဒါတွေက တကယ်ပဲ မှန်ပါသလား။ကျွန်မတို့နေ့စဉ်ပုံမှန်စားသောက်နေတဲ့အစာအာဟာရတွေထဲမှာ လိုအပ်တဲ့ Vitamin နဲ့သတ္ထုဓာတ်တွေ ပြည့်စုံစွာပါဝင်ပြီးသားဖြစ်တဲ့အတွက် မလိုအပ်ဘဲ အားဆေးသောက်ခြင်းက ကောင်းကျိုးထက်ဆိုးကျိုးများကိုသာ ပိုဖြစ်စေပါတယ်။ယုံတမ်းစကားတွေအရ တချို့ supplement တွေက ကင်ဆာရောဂါကိုတောင် ပျောက်ကင်းစေနိုင်တယ်ဆိုပြီး ကြေညာထားကြလို့ လူနာတွေဟာ တကယ့်ကုသမှုအပိုင်းကိုမလုပ်ဘဲ အားဆေးပဲ ထိုင်သောက်နေကြတာကို ဝမ်းနည်းဖွယ်ရာ တွေ့ရှိရပါတယ်။
ဒါပေမယ့် တချို့အခြေအနေတွေမှာတော့ ပါးစပ်ကစားရုံနဲ့ အာဟာရပြည့်ဝစွာမရနိုင်တဲ့အခါ အားဆေးကူရတဲ့အနေအထားတွေလည်းရှိပါတယ်။နာမည်ကြီးအားဆေးတွေထဲမှာ ပါဝင်လေ့ရှိတာကတော့ ဗီတာမင်ပေါင်းစုံ၊သံဓာတ်၊ကယ်လစီယမ်နဲ့ folic acid တို့ပဲဖြစ်ပါတယ်။ကျွန်မတို့ ထင်သာမြင်သာရှိတဲ့ ဥပမာ ကို ပြောရရင်
(၁)ကိုယ်ဝန်ဆောင်အမျိုးသမီးတိုင်းကို ဗိုက်ထဲကကလေးကျောရိုးပုံသဏ္ဍာန်မှန်စေရန်အတွက် folic acid တိုက်ကြပါတယ်။
(၂)အအေးမိဖျားနာ ရာသီတုပ်ကွေးတခုခုဖြစ်လျှင်လည်း ခုခံအားကောင်းအောင် vitamin C ပါတဲ့ ရေဆူဆေးပြား သို့မဟုတ် အားဆေးတိုက်လေ့ရှိကြပါတယ်။
(၃)သွေးဆုံးခါနီးနဲ့သွေးဆုံးသွားတဲ့အမျိုးသမီးတွေမှာ အရိုးပွနှုန်းလျော့ကျစေရန် vitamin D နဲ့ calcium ပါဝင်တဲ့အားဆေးများက စွမ်းဆောင်ပေးပါတယ်။
(၄)နာတာရှည်အိပ်မပျော်တတ်သူများအတွက် အိပ်ပျော်တဲ့ဟော်မုန်းထုတ်မှူကို ကူညီပေးရန် melatonin က အားဖြည့်ပေးပါတယ်။
(၅)ဝမ်းပျက်ဝမ်းလျှော လူနာများအတွက် အူလမ်းကြောင်းရဲ့ စနစ်ကို ပြန်လည်ထိန်းညှိရန် zinc နဲ့ folic acid ပါဝင်တဲ့ဆေးများ ညွှန်းသလို normal flora များ ပြန်အားဖြည့်ရန်အတွက် probiotic များ က တဖက်တလမ်းမှ ပါဝင်ပေးပြန်ပါတယ်။
ကျွန်မတို့ လိုအပ်နေတဲ့ vitamin နဲ့ သတ္ထုဓာတ်တွေက နေ့စဉ်စားသောက်နေတဲ့ အစားအစာတွေထဲပါပါနေပေမယ့် လိုသလောက် မရနိုင်တဲ့အခြေအနေတွေလည်းရှိပါတယ်။အဲဒီလို လိုအပ်နေတဲ့ကွက်လပ်လေးတွေကို supplement တွေက ဖြည့်စွမ်းပေးမှာပါ။ဒါပေမယ့် supplement တွေက နာတာရှည်ရောဂါတွေကို ပြန်ကောင်းစေနိုင်တဲ့အစွမ်း မရှိသလို အစားမစားဘဲ supplement ပဲ သောက်နေလို့လည်းမရတဲ့အကြောင်း အသိပေး လမ်းညွှန်လိုက်ရပါတယ်။
ဆောင်းပါးလေးကိုဒီမှာပဲအဆုံးသတ်လိုက်ပါရစေ။အချိန်ပေးဖတ်ရှုပေးတဲ့အတွက်ကျေးဇူးတင်ပါတယ်။