ကျွန်မတို့ ဆေးရုံဆေးခန်းသွားတဲ့အခါ ဘာဆေးနဲ့မတည့်တာရှိလဲဆိုပြီး အမေးခံရဖူးတာ သတိထားမိကြမယ်ထင်ပါတယ်။ဒီလိုပဲ ကိုယ့်ရဲ့ပတ်ဝန်းကျင်မှာရော အစားအစာနဲ့ ဓာတ်မတည့်တဲ့သူတွေကို ကြုံဖူးကြလား။တချို့က ပင်လယ်စာတွေဖြစ်တဲ့ ဂုန်း၊ခရု၊ကမာ၊ပုဇွန်တွေနဲ့ မတည့်တာဖြစ်ပြီး တချို့ကတော့ ရိုးရှင်းတဲ့ မြေပဲလို အရာနဲ့ ဓာတ်မတည့်တာတွေလည်းရှိပါတယ်။
မှတ်မှတ်ရရ ငယ်ငယ်တုန်းက ကျွန်မညီမလေးနဲ့ ကျွန်မရေခဲမုန့်တူတူစားနေကြတုန်း အငယ်မက ရုတ်တရက် ယားပြီး ပြာတက်ကာ တရွှီရွှီမြည်လာပါတယ်။အဲဒီအချိန်ကျမှ ရေခဲမုန့်ထဲမှာပါတဲ့မြေပဲနဲ့ဓာတ်မတည့်မှန်းသိတာပါ။မြေပဲနဲ့ ဓာတ်မတည့်တာက အဖြစ်အများဆုံး အစားအစာ ၉ မျိုးထဲမှာတမျိုးအပါအဝင်ဖြစ်ပါတယ်။ထူးဆန်းတာက မြေပဲနဲ့မတည့်ပေမယ့်လည်း တခြားပဲအမျိုးမျိုးကို စားလို့ရပါသေးတယ်။
မြေပဲနဲ့ဓာတ်မတည့်သူဟာ တခြားဆေးတွေဓာတ်မတည့်ဘဲ သောက်မိ/ထိုးမိတဲ့သူလိုပဲ အသက်အန္တရာယ်ဆုံးရှုံးရတဲ့အထိ ဖြစ်နိုင်ပါတယ်။စစချင်း ယားမယ်၊ပါးစပ်နဲ့လျှာတဝိုက်ထုံတာ၊နာတာဖြစ်လာမယ်၊ပြန်အန်တာမျိုး၊ပျို့တာမျိုးနဲ့ ဗိုက်အောင့်တာမျိုးတွေလည်း ဖြစ်န်ိုင်တဲ့အပြင် နှာရည်ကျတာကနေ အသက်ရှူမဝဘဲ ပြာနှမ်းလာတဲ့အထိ ဖြစ်တတ်ပါသေးတယ်။နောက်ဆက်တွဲအနေနဲ့ သွေးပေါင်ချိန်ကျပြီး သွေးခုန်နှုန်းတွေမြန်ကာ သတိလစ်သွားနိုင်ပါတယ်။
မြေပဲနဲ့ ဓာတ်မတည့်တာကို စားရင်းနဲ့မှ သိဖို့များပါတယိ။ဒါပေမယ့် ယနေ့ခေတ်မှာတော့ အစားအစာတွေနဲ့ ဓာတ်တည့်/မတည့်ကို အရေပြားပေါ်မှာ ကြိုတင်စမ်းသပ်စစ်ဆေးလို့ရနေပါပြီ။ဓာတ်မတည့်ခြင်းဖြစ်တဲ့အခါမှာလည်း ဆေးရုံဆေးခန်းကိုအမြန်သွားရောက်ပြီး ရောဂါပြင်းထန်မှုအလိုက် အသက်ကယ်ဆေးထိုးရတဲ့အထိဖြစ်နိုင်ပါတယ်။ဒါကြောင့်မို့ လူကြီး၊လူငယ်၊ကလေးတွေပါမကျန် မြေပဲနဲ့ဓာတ်မတည့်ရင် သတိထားပြီး ရှောင်ကြဉ်နိုင်ဖို့ ရေးသားလိုက်ရပါတယ်ရှင်။