စျေးထဲမှာ သရက်သီးမှည့်တွေ လှိုင်လှိုင်ပေါအောင် တွေ့ရတဲ့အခါ ပွင့်လင်းကာလနွေဦးရာသီကို ရောက်ရှိလာကြောင်း အလိုလိုသိရှိရပါတယ်။ဥဩငှက်ရဲ့တွန်သံနဲ့ လွမ်းမောဖွယ်ရာနွေကာလကိုကြိုဆိုနေသလို ဆေးရုံဆေးခန်းအသီးသီးမှာလည်း ဝမ်းပျက်ဝမ်းလျှောလူနာတွေ ပြုံလာကြပါပြီ။ဒါဟာနွေရာသီရောက်လို့ ဝမ်းပျက်တာလား၊ရောဂါပိုးအထူးအဆန်းတမျိုးကြောင့်လား။
ရာသီဥတု ပူပြင်းလို့ ရေဓာတ်ဆုံးရှုံးပြီး ခန္ဓာကိုယ်ရဲ့ အစာခြေစနစ် အားနည်းသွားတာကလည်း အကြောင်းတစ်ခုဖြစ်ပါတယ်။ဒါဟာလည်း မိုးရာသီလိုပဲ နွေရာသီမှာလည်း ဝမ်းပျက်ဝမ်းလျှောဖြစ်နိုင်ခြေ ပိုများပါတယ်။ဖြစ်ရတဲ့အကြောင်းအရင်းတွေကို ရှာဖွေကြည့်တဲ့အခါ နွေရာသီမှာ ပူပြင်းတဲ့အပူရှိပါတယ်။ဒီအပူရှိန် က ဘက်တီးရီးယား၊ဗိုင်းရပ်စ်နဲ့ မှိူအမျိုးမျိုးကို ပေါက်စေရုံသာမက ခြင်၊ယင်၊ကပ်ပါးကောင်နဲ့ ပိုးဟပ်တွေ သားဥလောင်းများ အကောင်ပေါက်တဲ့အချိန်လည်း ဖြစ်ပါတယ်။ဒါကြောင့်မို့ ဒီရာသီဥတုမှာ အစားအသောက်တွေကို သေချာမှန်ကန်စွာ မသိမ်းဆည်းပါက စားမိတဲ့သူမှာ ဝမ်းပျက် ဝမ်းလျှော ဖြစ်လွယ်ပါတယ်။
နွေရာသီမှာ လမ်းဘေးအစားအစာများမှာ ပိုးပေါက်ပွါးမှူပိူများတတ်ပါတယ်။အထူးသဖြင့် အမှိုက်သေချာမစွန့်ပစ်ခြင်း၊လက်သေချာမဆေးခြင်း၊အစားအသောက်ပြင်ဆင်တဲ့နေရာမှာ ယင်တလောင်းလောင်း အုံနေခြင်း၊မီးပုံမှန်မရတဲ့အတွက် ရေခဲသေတ္တာထဲမှ အစားများ ပိုးပေါက်လွယ်ခြင်းတို့ကြောင့် ဝမ်းနူးလွယ်ပြီးဝမ်းပျက်ဝမ်းလျှောပိုဖြစ်စေနိုင်ပါတယ်။ဒါ့အပြင် နွေဦးကာလအလှူအတန်းလုပ်ကြရာမှာလည်းသန့်စင်တဲ့ရေ မရရှိခြင်းကြောင့် အစားအသောက်တွေကသာမက ရေကပါ အစာအဆိပ်သင့်ခြင်းနဲ့ ဝမ်းရောဂါပိုး (ဥပမာ - ကာလဝမ်းရောဂါ) ကူးစက်နိုင်ပါတယ်။
ဒါကြောင့်မို့ နွေနေပူမှာ ပူအိုက်ရတဲ့အပြင် အိမ်သာနဲ့အခါခါမိတ်ဆက်ပြီး ချွေးထုတ်ခန်းထဲရောက်နေသလို မဖြစ်ရလေအောင် အစားအစာတွေကို သေချာကျက်အောင် ချက်ပြီး ပူပူနွေးနွေးစားပါ။လတ်ဆတ်သန့်ရှင်းတဲ့အစားအစာကို ရွေးချယ်ပါ။လမ်းဘေးစာ ရှောင်ပါ။သန့်စင်တဲ့ရေ (သို့) ကျိုချက်ထားတဲ့ရေကိုသာ သောက်ပါ။အစာမစားမီ၊ အိမ်သာတက်ပြီးတိုင်း ဆပ်ပြာနဲ့ စင်အောင်ဆေးပါ။တကယ်လို့ ဝမ်းလျှောတာ ၄၈ နာရီကျော်နေတာမျိုး၊ဆန်ဆေးရည်လိုသွားနေတာမျိုး၊ဝမ်းထဲ အချွဲနဲ့သွေးတွေပါတာမျိုးရှိနေရင်တော့ နီးစပ်ရာဆေးခန်း၊ဆရာဝန်နဲ့ပြသပြီး အမြန်ကုသမှူခံယူဖို့ လိုအပ်ပါတယ်။နွေနေပူမှာ ကျန်းမာရေးနဲ့ညီအောင် ဂရုတစိုက်နေထိုင်စားသောက်ကြပြီး ပျော်ရွှင်စရာသရက်သီးမှည့်ရာသီကို ဖြတ်သန်းနိုင်ကြပါစေ။